Gen 41 | JAE | STEP | Jala samuc luagêc gêjaŋa ma Parao gêc mê gebe kêkô bu Nil ŋatali

Genesis 41

Josep gêwa Paraonê mê ŋam sa

1 Jala samuc luagêc gêjaŋa ma Parao gêc mê gebe kêkô bu Nil ŋatali 2 ma gêlic bulimakao ŋajam to têtôp ŋajam 7 sêpi aŋga bu Nil mêŋseŋ siŋ ŋalauŋ sêmoa. 3 Gocgo bulimakao sec toôliŋ ŋasaŋ kaiŋ teŋ 7 sêpi aŋga bu Nil têdaguc êsêac mêŋsêkô sêwiŋ bulimakao ŋagêdô sêmoa bu Nil ŋatali. 4 Ma bulimakao sec toôliŋ ŋasaŋ têdaŋgôŋ bulimakao ŋajam to têtôp ŋajam tau su e Parao mata gêlac. 5 Ma eŋ kêliŋ tau siŋ kêtiam e gêc mê kêtu luagêcŋa gebe Mopolom teŋ ŋakaiŋ tageŋ gêjam ŋanô ŋajam to kesewec kapôêŋ 7. 6 Su, go gêlic ŋanô sec to ŋapaôma 7 mêŋkêpi, taŋ mu aŋga oc kêpiŋa kêlêsaŋ naŋ. 7 Go ŋanô sec kêdaŋgôŋ ŋanô ŋajam to kapôêŋ 7 tau su e Parao mata gêlac ma kêsaê gebe gêc mê. 8 Gêdêŋ bêbêc eŋ gamoa tonê ŋalêlôm ŋawapacgeŋ. Kêtu tonaŋŋa eŋ kêsakiŋ biŋ gêdêŋ lau seoc biŋ lasêwaga to gêdêŋ lau tokauc samob, taŋ sêmoa Aiguptu naŋ, gebe sêmêŋ ma gêjac miŋ nê mê gêdêŋ êsêac. Mago êsêacnêŋ ŋac teŋ kêtôm gebe êwa mê ŋam sa êndêŋ Parao atom.

9 Gêdêŋ tonaŋ go ŋac kêpip wain ŋanôŋa kêsôm gêdêŋ Parao gebe “Ocsalô tonec aê taêc gêjam ŋoc keso. 10 Gêdêŋ taŋ Parao têtac ŋandaŋ gêdêŋ nê sakiŋwaga ma kêkêŋ aêagêc ŋac polomŋa aŋgôŋ siŋwaganêŋ kapitainê andu gebe sejop aêagêcŋa naŋ, 11 aêagêc aêc ma gêdêŋ gêbêc tageŋ ma aêagêcma ma keso tau to ŋam keso tau amboac tonaŋgeŋ. 12 Ŋacseŋom Ebolaiŋa teŋ gêŋgôŋ gêwiŋ aêagêc. Eŋ kêtu siŋwaganêŋ kapitainê sakiŋwaga teŋ. Aêagêc ajac miŋ ma ma gêdêŋ eŋ ma eŋ gêwa mê ŋam sa gêdêŋ aêagêc. Eŋ gêwa sa gêdêŋ aêagêc gêdêŋ-gêdêŋgeŋ katôm ma ma tau. 13 Ma biŋ tau, taŋ gêwa sa gêdêŋ aêagêc naŋ, ŋanô kêsa. Sêsuŋ ŋoc sakiŋ gêdêŋ aê kêtiam ma sêkêŋ ŋac kêpac polomŋa geŋkaleŋ ka.”

14 Tec Parao kêsakiŋ lau gebe sêmôêc Josep. Êsêac sêkôc eŋ sebeŋ sa aŋga gêsuŋ. Eŋ kêkaliŋ tau ma kêsô ŋakwê wakuc sa su acgom, go kêsô jakêkô Parao laŋônêm. 15 Tec Parao kêsôm gêdêŋ Josep gebe “Aê gaêc ma teŋ ma ŋamalac teŋ kêtôm gebe êwa ma tau ŋam saŋa gamoa atom. Mago aê gaŋô aôm ŋawae gebe aôm embe ôŋô ma teŋ, go ôtôm gebe ôwa ŋam sa solop.” 16 Josep gêjô Parao awa gebe “Biŋ amboac tonaŋ gêc aêŋa atom. Anôtô tau êjô aôm awam ma awa nêm ma sa ŋajamgeŋ.” 17 Go Parao kasôm gêdêŋ Josep gebe “Aê gaêc ma gebe kakô bu Nil ŋatali 18 ma bulimakao ŋajam to têtôp ŋajam 7 sêpi aŋga bu Nil mêŋseŋ siŋ ŋalauŋ sêkô. 19 Ma bulimakao 7 kêtiam sêpi têdaguc êsêac. Êsêac ôliŋ ŋasaŋ to sec ma ŋatêkwa ŋaôma. Aê galic gêŋ teŋ amboac tonaŋ sêmoa Aiguptunêŋ gamêŋ atomanô. 20 Ma bulimakao ôliŋ ŋasaŋ to sec gacgeŋ têdaŋgôŋ bulimakao ŋamataŋa 7, taŋ têtôp ŋajam naŋ su. 21 Mago gêdêŋ taŋ têdaŋgôŋ êsêac su naŋ, talic êsêac amboac têdaŋgôŋ gêŋ teŋ atom, ôliŋ ŋasaŋ ŋaômageŋ sêmoa katôm gêmuŋŋa. E matoc gêlac. 22 Ma aê gaêc ma teŋ kêtiam naŋ galic mopolom ŋakaiŋ tageŋ gêjam ŋanô 7. Ŋanô tau ŋajam to kapôêŋ. 23 Ma galic ŋanô 7 gêuc mêŋkêpi kêdaguc. Gêŋ tau kêmêliŋ ma ŋapaôma to mu aŋga oc kêpiŋa kêlêsaŋ. 24 Ma ŋanô ŋapaôma kêdaŋgôŋ ŋanô ŋajam 7. Aê gajac miŋ biŋ tonaŋ gêdêŋ lau-seoc-biŋ-lasêwaga, mago êsêacnêŋ ŋac teŋ kêtôm gebe awa ma tau ŋam sa atom.”

25 Ma Josep kêsôm gêdêŋ Parao gebe “O Parao, nêm mê luagêc tau ŋam tageŋ. Anôtô geoc biŋ, taŋ eŋ gebe êŋgôm naŋ, lasê gêdêŋ aôm. 26 Bulimakao ŋajam 7 to polom ŋanô ŋajam 7 têtôm jala 7. Ma lulu tau ŋam tageŋ. 27 Ma bulimakao ŋatêkwa ŋaôma to sec 7, taŋ mêŋsêpi têdaguc êsêac naŋ, têtôm jala 7. Ŋanô 7 ŋapaôma to mu aŋga oc kêpiŋa kêlêsaŋ atôm jala 7 totôbôm amboac tonaŋ. 28 Amboac kasôm gêdêŋ aôm su gebe Anôtô kêtôc gêŋ, taŋ gebe êŋgôm naŋ, gêdêŋ aôm. 29 alic acgom, galoc jala 7 tomoasu ênêc Aiguptu ŋagamêŋ samucgeŋ. 30 Mago tonaŋ su, go jala totôbôm 7 mêŋêsa ma êsêac saliŋ têm moasuŋa siŋ samucgeŋ aŋga Aiguptu. Tôbôm enseŋ gamêŋ su. 31 Ma êsêac sênam kauc moasu aŋga gamêŋ tau atu tôbôm, taŋ mêŋêsa êndaŋguc naŋŋa, ma tôbôm tau oc anam sêga. 32 Aôm gôêc mê kêtu dim luagêc ŋam gebe Anôtô taê gêjam biŋ tau kêtu tôŋ sugac, ma sauŋgeŋ, go Anôtô êŋgôm gêŋ tau ŋanô êsa. 33 Amboac tonaŋ galoc aôm ôjaliŋ ŋac wapac ma ŋac tokauc teŋ sa ma ôkêŋ eŋ ênam gôliŋ gamêŋ Aiguptu. 34 Aôm ôkêŋ gejobwaga êtôm gamêŋ samobgeŋ. Êndêŋ jala tomoasu 7 tonaŋ lau embe têtap polom talu lemeŋ teŋ- lemeŋ teŋ sa, go sêkôc talu tageŋ-tageŋ su aŋga êsêacnêŋ atôm gamêŋ Aiguptuŋa samob. 35 Ôjatu gebe sênac polom sasa êndêŋ jala ŋajam, taŋ mêŋêsa naŋ, ma sênac polom tau tôŋ sênam aôm laŋôm. Sejoŋ polom ŋanô samob sêpi malacsêgageŋ êna ma sejop tôŋ. 36 Gêŋ masê tonaŋ ênêc e êlôm lau gamêŋ tonaŋŋa êndêŋ jala totôbôm 7, taŋ mêŋêsa aŋga Aiguptu naŋ, gebe tôbôm enseŋ gamêŋ tau popoc atom.”

Josep kêtu gôliŋwaga Aiguptuŋa

37 Parao to nê sakiŋwaga samob sêŋô biŋ tonaŋ ŋajam. 38 Ma Parao kêsôm gêdêŋ nê sakiŋwaga gebe “Aêac oc tatap ŋac, taŋ Anôtônê Ŋalau gêjam eŋ auc kêtôm ŋac tonec naŋ, teŋ sa me masi.” 39 Tec Parao kasôm gêdêŋ Josep gebe “Anôtô kêtôc gêŋ samob tonaŋ gêdêŋ aôm, kêtu tonaŋŋa ŋac wapac ma ŋac tokauc teŋ kêtôm aôm gamoa atom. 40 Aôm ôtu ŋoc andu ŋatau ma ŋoc lau samob taŋeŋ wamu aômnêm biŋ. Lêpôŋ kiŋŋa tageŋ êkêŋ aê jalêlêc aôm su.” 41 Go Parao kêsôm gêdêŋ Josep gebe “Ôlic acgom, aê kakêŋ aôm kôtu gamêŋ Aiguptuŋa samucgeŋ ŋatau.” 42 Ma Parao kêkôc nê riŋ toŋatalô êwa eŋ saŋa mêŋkêkêŋ gêdêŋ Josep kêka. Eŋ kakêŋ ŋakwê ŋajam- ŋajam gêdêŋ eŋ kêsô ma kêkêŋ kapoacwalô gold eŋ gênôŋ. 43 Go kêkêŋ eŋ gêŋgôŋ nê kareta kêtu luagêcŋa ma êsêac sêmôêc sêsêlêŋ sêmuŋ gebe “Apôŋ aemduc.” Amboac tonaŋ Parao kêkêŋ eŋ kêtu gamêŋ Aiguptuŋa samucgeŋ ŋatau. 44 Ma Parao kêsôm gêdêŋ Josep gebe “Aê Parao, mago ŋac teŋ aŋga gamêŋ Aiguptuŋa ênam kôm teŋ me êŋgôm gêŋ teŋ êôc lêlêc aôm atom.” 45 Ma Parao kêsam Josepnê ŋaê gebe Sapenat-Panea. * Ma eŋ kêkêŋ dabuŋwaga aŋga On ** Potipera latuo Asenat gêdêŋ eŋ gêjam kêtu ênê awê. Su, go Josep gêwi Parao siŋ ma gêjac gamêŋ Aiguptuŋa kêsi.

46 Gêdêŋ taŋ Josepnê jala kêtu 30 naŋ, eŋ kêkôc kôm anam sakiŋ kiŋ Aiguptuŋa Parao sa. Ma Josep gêwi Parao siŋ ma gêjac laoc gamêŋ Aiguptuŋa. 47 Gêdêŋ jala tomoasu 7 naŋ kôm gêjam ŋanô taêsam. 48 Ma eŋ kejoŋ jala tomoasu 7 ŋapolom samob sa aŋga gamêŋ Aiguptuŋa to gêjac gêŋ tau sa kêkô kêtôm malacsêgageŋ. Eŋ gêjac kôm, taŋ kêgi malac auc kêtômgeŋ naŋ, ŋaŋanô sa kêkô malac gêdêŋ-gêdêŋgeŋ. 49 Tec Josep gêjac polom taêsam sa kêtôm gaŋac gwêcŋa. Eŋ gedec gebe ênam dôŋ to êsa gêŋ tau sa atom gebe ŋamalac teŋ kêtôm gebe ênam dôŋ to êsa gêŋ amboac tonaŋ ŋai sa nec atomanô.

50 Jala tôbômŋa gêô lasê atom tageŋ ma Josep kêka ŋapalê luagêc lasê. Dabuŋwaga Onŋa Potipera latuo Asenat kêkôc êsêagêc. 51 Josep gê ŋacsêganê ŋaê gebe Manase ma kêsôm gebe “Gaê ênê ŋaê Manase gebe Anôtô gêgôm aê kaliŋ ŋoc gêŋwapac to tamocnê andu ŋagôlôac samob siŋ.” 52 Gê ŋac kêtu luagêcŋa nê ŋaê gebe Epraim gebe “Anôtô kêkêŋ gôlôac gêdêŋ aê aŋga gamêŋ ŋoc gêŋwapacŋa.” 53 Jala tomoasu 7, taŋ gêc gamêŋ Aiguptuŋa naŋ, mêŋgêjac pep 54 ma jala totôbôm 7 mêŋkêsa kêtôm Josep kêsôm naŋ. Ma tôbôm gêjam gamêŋ ŋagêdô samob auc, aŋga gamêŋ Aiguptuŋa tageŋ, tec têtap nêŋ polom sa. 55 Gêdêŋ taŋ lau Aiguptuŋa sêôc tôbôm naŋ, lau têtaŋ polom gêdêŋ Parao. Ma Parao kêsôm gêdêŋ lau Aiguptuŋa samob gebe “Andêŋ Josep ana ma biŋ samob, taŋ eŋ êsôm naŋ aŋgôm.” 56 Ma gêdêŋ taŋ tôbôm gêjam gamêŋ samucgeŋ auc naŋ, Josep gêlêc katam su andu gêŋ ŋanôŋa ma kêkêŋ gêŋ gêdêŋ lau Aiguptuŋa sêjam ôli gebe tôbôm kapôêŋ gêc gamêŋ Aiguptuŋa amboac tonaŋgeŋ. 57 Tôbôm gêjam sêga, tec lau gamêŋ pebeŋŋa sêja Aiguptu sebe sênam ôli polom aŋga Josepnê, gebe tôbôm kapôêŋ gêjam nom ŋagamêŋ samob auc. ^{▼▼ Sapenat-Panea ŋam gebe Anôtô kêsôm gebe eŋ gêmoa mata} jali. ^{▼▼ On kêtu lau Aiguptu nêŋ malac dabuŋ towae. Êsêac} tetoc oc sa kêtu nêŋ anôtô jaba.